Ўзбекистон мусулмонлари идораси раиси, муфтий Нуриддин домла ҳазратлари муборак Рамазон ойи давомида мамлакатимиз бўйлаб сафарлар қилиб, вилоятлар, туман-шаҳарлар ҳокимлари ва аҳоли вакиллари билан мулоқотлар ўтказмоқдалар.
Улуғ ой аввалида Қорақалпоғистон Республикаси, Хоразм вилоятидан бошланган сафар олис воҳа вилоятларига уланган бўлса, айни кунларда водий вилоятларида давом этмоқда.
Ташрифлар давомида Муфтий ҳазратлари кенг халқ оммаси билан учрашувлар, аҳоли вакиллари билан мулоқотлар ўтказиш, жоме масжидлардаги таровеҳ намозларида мўмин-мусулмонларга мавъизалар қилиш, эҳтиёжманд оилалар ҳолидан хабар олиш ва кам таъминланган оилалар хонадонларидаги ифторликларда иштирок этиш кабиларга алоҳида урғу қаратмоқдалар.
Шунингдек, масжидлар ҳолатини яхшилаш, мўмин-мусулмонлар эҳтиёжини қондириш ва мадрасаларда таълим-тарбия жараёнларини такомиллаштириш борасида муҳим тавсияларни бермоқдалар.
