30 апрель куни “Ҳаж – 2026” мавсумини юқори даражада ўтказиш масалаларига бағишланган видеоселектор йиғилиши бўлиб ўтди. Унда Дин ишлари бўйича қўмита раиси Содиқжон Тошбоев, Ўзбекистон мусулмонлари идораси раиси, муфтий Шайх Нуриддин Холиқназар ҳазратлари, шифокорлар гуруҳи раҳбари Алишер Саатов, шунингдек, ҳаж делегацияси вакиллари, ишчи гуруҳи аъзолари, шифокорлар ва ошпазлар жамоаси иштирок этди. Дин ишлари бўйича қўмита раиси Содиқжон Тошбоев кейинги йилларда муҳтарам Президентимиз томонидан ҳожилар учун шарт-шароитларни йилдан-йилга янада яхшилаш бўйича кенг кўламли ишлар амалга оширилаётганини гапириб ўтди. Ушбу вазифалар ижроси доирасида Макка шаҳрида зиёратчиларнинг асосий қисми бир ҳудуддаги меҳмонхоналарга жойлаштирилиши маълум қилинди. Шунингдек, бугунги мураккаб замонда Саудия Арабистони томонидан белгиланган янги қонун-қоидаларга қатъий амал қилиш, ҳожилар хавфсизлигини таъминлаш ва огоҳликни оширишга оид муҳим тавсиялар берди. Муфтий ҳазратлари ўз нутқида ҳаж қилувчи инсон Ҳақ таолонинг меҳмони эканини, шу боис зиёратчига кўмак берган ва унинг оғирини енгил қилган киши улуғ ажру савобларга ноил бўлишини алоҳида эслатиб ўтдилар. Шундай экан, ҳар бир ишчи гуруҳи аъзоси ана шундай юксак даражаларни мақсад қилган ҳолда, ҳожиларга Аллоҳ таоло рози бўладиган даражада хизмат қилиши лозимлигини таъкидладилар. Шайх Нуриддин Холиқназар ҳазратлари йиғилишда муборак сафар давомида зиёратчилар билан мунтазам суҳбатлар ташкил этиш зарурлигини қайд этдилар. Ушбу учрашувларда вақтни ғанимат билиш, тоат-ибодатларни чиройли адо этиш, зикру дуолар қилиш кабиларга урғу қаратиш баробарида зиёратчиларнинг саволларига Фатво маркази масъуллари орқали жавоб бериш лозимлиги айтиб ўтилди. Шунингдек, аёл зиёратчилар учун ҳам алоҳида аёл мутахассис ва шифокорлар ажратилгани таъкидланди. Йиғилишда айни пайтда Саудия Арабистонида бўлиб турган «Ҳаж – 2026» мавсуми илк ишчи гуруҳлари ҳамкор ташкилотлар билан биргаликда меҳмонхоналар, Мино ва Арофот водийларида зиёратчиларнинг ибодатларини бекаму кўст адо этишлари учун муносиб шароитлар тайёрлаш бўйича фаол иш олиб бораётгани қайд этилди.Тадбир якунида Ҳақ таолодан бу йилги ҳаж мавсуми муваффақиятли ва хайрли ўтишини сўраб дуолар қилинди.
***
30 aprel kuni “Haj – 2026” mavsumini yuqori darajada o‘tkazish masalalariga bag‘ishlangan videoselektor yig‘ilishi bo‘lib o‘tdi. Unda Din ishlari bo‘yicha qo‘mita raisi Sodiqjon Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, shifokorlar guruhi rahbari Alisher Saatov, shuningdek, haj delegatsiyasi vakillari, ishchi guruhi a’zolari, shifokorlar va oshpazlar jamoasi ishtirok etdi. Din ishlari bo‘yicha qo‘mita raisi Sodiqjon Toshboyev keyingi yillarda muhtaram Prezidentimiz tomonidan hojilar uchun shart-sharoitlarni yildan-yilga yanada yaxshilash bo‘yicha keng ko‘lamli ishlar amalga oshirilayotganini gapirib o‘tdi. Ushbu vazifalar ijrosi doirasida Makka shahrida ziyoratchilarning asosiy qismi bir hududdagi mehmonxonalarga joylashtirilishi ma’lum qilindi. Shuningdek, bugungi murakkab zamonda Saudiya Arabistoni tomonidan belgilangan yangi qonun-qoidalarga qat’iy amal qilish, hojilar xavfsizligini ta’minlash va ogohlikni oshirishga oid muhim tavsiyalar berdi. Muftiy hazratlari o‘z nutqida haj qiluvchi inson Haq taoloning mehmoni ekanini, shu bois ziyoratchiga ko‘mak bergan va uning og‘irini yengil qilgan kishi ulug‘ ajru savoblarga noil bo‘lishini alohida eslatib o‘tdilar. Shunday ekan, har bir ishchi guruhi a’zosi ana shunday yuksak darajalarni maqsad qilgan holda, hojilarga Alloh taolo rozi bo‘ladigan darajada xizmat qilishi lozimligini ta’kidladilar. Shayx Nuriddin Xoliqnazar hazratlari yig‘ilishda muborak safar davomida ziyoratchilar bilan muntazam suhbatlar tashkil etish zarurligini qayd etdilar. Ushbu uchrashuvlarda vaqtni g‘animat bilish, toat-ibodatlarni chiroyli ado etish, zikru duolar qilish kabilarga urg‘u qaratish barobarida ziyoratchilarning savollariga Fatvo markazi mas’ullari orqali javob berish lozimligi aytib o‘tildi. Shuningdek, ayol ziyoratchilar uchun ham alohida ayol mutaxassis va shifokorlar ajratilgani ta’kidlandi. Yig‘ilishda ayni paytda Saudiya Arabistonida bo‘lib turgan «Haj – 2026″ mavsumi ilk ishchi guruhlari hamkor tashkilotlar bilan birgalikda mehmonxonalar, Mino va Arofot vodiylarida ziyoratchilarning ibodatlarini bekamu ko‘st ado etishlari uchun munosib sharoitlar tayyorlash bo‘yicha faol ish olib borayotgani qayd etildi. Tadbir yakunida Haq taolodan bu yilgi haj mavsumi muvaffaqiyatli va xayrli o‘tishini so‘rab duolar qilindi.
