Шоазим Миноваров – Alhidoya.uz

Диний соҳа раҳбарлари масжиддаги шароит ва имом-хатиб фаолияти билан яқиндан танишди

Alhidoya.uz таҳририяти — Sat, 25 Sep 2021 12:08:17 +0000

Навоий вилоятига сафар давомида Диний соҳа раҳбарлари, бир гуруҳ уламолар ҳудуд аҳлини юртимизда бўлаётган ўзгаришлар мазмун-моҳияти ҳақида хабардор қилиш билан бир қаторда, уларнинг дарду ташвишларига кўмаклашиш, фикр-мулоҳазаларини тинглаш ва диний соҳага тегишли муаммоларини жойида ўрганиб, бартараф этмоқда.

Жорий йил 23 сентябрь куни Президент маслаҳатчиси Шоазим Миноваров, Дин ишлари бўйича қўмита раиси Содиқжон Тошбоев Конимех туманидаги “Мих Ота” жоме масжидига ташриф буюриб, жомени кўздан кечирди, имом-хатиблар фаолияти билан яқиндан танишди.

Ташриф давомида Диний соҳа раҳбарлари масжидда мўмин-мусулмонларга қилинган шароитларни кўриб, мутассадди вакиллар, масжид ходимларига намозхонларга янада қулайликлар яратиш ҳақида таклифлар берди. Хусусан, масжид кутубхонасини диний-маърифий, илмий китоблар билан бойитиш бўйича тавсиялар берди.

Шунингдек, масжид жойлашган маҳаллалардаги нуроний отахон ва фаоллар билан учрашиб, юртимизда амалга оширилаётган ислоҳотлар, сўнги янгиликлар ҳақида маълумот берди.

Шоазим Миноваров “Ўзбекистон белгиси” кўкрак нишони билан тақдирланди

Alhidoya.uz таҳририяти — Fri, 27 Aug 2021 10:32:02 +0000

Янги Ўзбекистонда илм-фан, маданият, таълим, соғлиқни сақлаш ва бошқа соҳаларда кўп йиллар давомида ҳалол ва самарали меҳнат қилган юртдошларимизни давлатимизнинг юксак унвон, медаль хамда орденлари билан мукофотлаш анъанасига катта эътибор қилинмоқда.

Ўзбекистон Республикаси давлат мустақиллигининг 30 йиллик байрами муносабати билан “Ўзбекистон белгиси” кўкрак нишони билан бир гуруҳ ватандошларимиз тақдирланди.

Мукофотланганлар орасида Президент маслаҳатчиси, Ўзбекистон Ислом цивилизацияси маркази директори, давлат ва жамоат арбоби, моҳир таржимон Шоазим Миноваров “Ўзбекистон белгиси” кўкрак нишони соҳиби бўлдилар.

Ўзбекистон мусулмонлари идораси жамоаси ушбу юксак мукофот билан тақдирланган Шоазим Миноваровни самимий муборакбод этади.

Аллоҳ таолодан дин, халқ ва Ватан йўлидаги хизматларида улкан муваффақиятлар бардавом бўлишини тилаймиз, мустаҳкам соғлиқ, узоқ умр ва оилавий бахт ёр бўлишини сўраймиз!

Шоазим Миноваров Президент маслаҳатчиси этиб тайинланди

Alhidoya.uz таҳририяти — Tue, 25 May 2021 10:30:52 +0000

Ўзбекистон Президенти фармони билан давлат раҳбарининг жамоат ва диний ташкилотлар билан ҳамкорлик масалалари бўйича маслаҳатчиси тайинланди. Бу ҳақда Президент матбуот хизмати хабар берди.

Ҳужжатга кўра, Шоазим Миноваров Ўзбекистон Президентининг жамоат ва диний ташкилотлар билан ҳамкорлик масалалари бўйича маслаҳатчиси лавозимида иш бошлади.

Шоазим Миноваров 1951 йил туғилган. 1997 йил 27 июндан 2006 йил 1 августгача Вазирлар Маҳкамаси ҳузуридаги Дин ишлари бўйича қўмита раисининг биринчи ўринбосари, раиси бўлган. 2006 йил 1 августдан 1 декабригача – Ўзбекистон Президентининг давлат маслаҳатчиси, 2006 йил 1 декабрдан 2008 йил 28 июнгача – Ўзбекистон ташқи ишлар вазирининг ўринбосари. У 2008-2012 йилларда Ўзбекистоннинг Мисрдаги элчиси бўлган, 2013 йилда пенсияга чиқарилган. 2015 йил апрел ойидан 2017 йил июл ойигача Тошкентдаги Француз альянси раиси бўлган.