Давлатимиз раҳбарининг «Муборак Рамазон ойини муносиб тарзда ўтказиш тўғрисида»ги қарорига биноан бу йилги қутлуғ ой «Рамазон – саховат, бирдамлик ва бағрикенглик ойи» шиори остида ўтказилмоқда. Имом-хатиблар саъй-ҳаракати билан аҳолининг маънавий-моддий кўмакка муҳтож қатламига кўрсатилаётган ёрдамлар салмоғи тобора ортмоқда. Муборак ойда марғилонлик имом-хатиблар ҳам тарғибот гуруҳи фаоллари билан шаҳридаги ногирон, боқувчисини йўқотган, кам таъминланган, ижтимоий кўмак ва ҳимояга муҳтож шахслар, ўзга дин ва миллатга мансуб кишилар ҳолидан хабар олдилар. Улар билан мулоқот ўтказиб, муаммолари ўрганилди. Юртимизда амалга оширилаётган ислоҳотлар тилга олинди, турли миллат ва дин вакиллари бағрикенглик руҳида ва дўстона муносабатда яшаётганлар эътироф этилди.

Дарҳақиқат, қайси жамиятларда аҳиллик, биродарлик, ўзаро ҳамжиҳатлик жорий бўлса, тараққиёт, равнақ ва эл осойишталиги-ю халқ фаровонлиги ҳукм сурган. Аксинча, қай бир жамиятда муросасизлик, ўзаро хусумат кучайса, бундай жамиятларда уруш ва можаролар авж олган, юрт вайрон, эл пароканда бўлган. Аллоҳ таоло бандаларини урушишга, бир-бирларининг қонини тўкишга, можаролар чиқаришга эмас, қандай дин ва эътиқодда бўлишдан қатъий назар аҳилликда, бир-бирларига бағрикенгликда, ўзгаларнинг ҳақ-ҳуқуқларини ҳурматлаган ҳолда яшашга буюрган.

Ташриф давомида халқимизни Рамазон ойи билан муборакбод этилди, тинчлик ва хотиржамликка яна бир бор шукрона келтириб, дуо қилинди.

Фарғона вилояти вакиллиги Матбуот хизмати

***

Payg‘ambarimiz alayhissalom Ramazon oyida barcha odamlarga mehribon bo‘lib, eng ko‘p saxovatli bo‘lganlar. Ibn Abbos (r.a.) rivoyat qilgan hadisda: “Rasululloh sollallohu alayhi vasallam eng saxovatli inson edilar. Ayniqsa, Ramazonda saxovatlari yanada oshardi. Rasululloh (s.a.v.) Ramazonda esayotgan mo‘tadil shamol kabi odamlarga saxovat ko‘rsatardilar”, deyilgan.

Davlatimiz rahbarining «Muborak Ramazon oyini munosib tarzda o‘tkazish to‘g‘risida»gi qaroriga binoan bu yilgi qutlug‘ oy «Ramazon – saxovat, birdamlik va bag‘rikenglik oyi» shiori ostida o‘tkazilmoqda. Imom-xatiblar sa’y-harakati bilan aholining ma’naviy-moddiy ko‘makka muhtoj qatlamiga ko‘rsatilayotgan yordamlar salmog‘i tobora ortmoqda. Muborak oyda marg‘ilonlik imom-xatiblar ham targ‘ibot guruhi faollari bilan shahridagi nogiron, boquvchisini yo‘qotgan, kam ta’minlangan, ijtimoiy ko‘mak va himoyaga muhtoj shaxslar, o‘zga din va millatga mansub kishilar holidan xabar oldilar. Ular bilan muloqot o‘tkazib, muammolari o‘rganildi. Yurtimizda amalga oshirilayotgan islohotlar tilga olindi, turli millat va din vakillari bag‘rikenglik ruhida va do‘stona munosabatda yashayotganlar e’tirof etildi.

Darhaqiqat, qaysi jamiyatlarda ahillik, birodarlik, o‘zaro hamjihatlik joriy bo‘lsa, taraqqiyot, ravnaq va el osoyishtaligi-yu xalq farovonligi hukm surgan. Aksincha, qay bir jamiyatda murosasizlik, o‘zaro xusumat kuchaysa, bunday jamiyatlarda urush va mojarolar avj olgan, yurt vayron, el parokanda bo‘lgan. Alloh taolo bandalarini urushishga, bir-birlarining qonini to‘kishga, mojarolar chiqarishga emas, qanday din va e’tiqodda bo‘lishdan qat’iy nazar ahillikda, bir-birlariga bag‘rikenglikda, o‘zgalarning haq-huquqlarini hurmatlagan holda yashashga buyurgan.

Tashrif davomida xalqimizni Ramazon oyi bilan muborakbod etildi, tinchlik va xotirjamlikka yana bir bor shukrona keltirib, duo qilindi.

Farg‘ona viloyati vakilligi Matbuot xizmati

Нима учун “садақа” деб номланишини биласизми? “Садақа” араб тилидан таржима қилинганда “тўғрилик, ростгўйлик” деган маънони англатади. Чунки садақа қилган кишининг садақаси у кишини жаннат мартабаларига қизиқишлигини тўғри, рост эканлигидан хабар беради. Садақа қилган киши ўзи яхши кўрган нарсани ҳеч бир эвазсиз бир муҳтожга беришлик билан у кишини иймонини рост, тўғри экнлигига далил бўлади. Шу сабаблардан “садақа” деб номланди.

Анас розияллоҳу анҳудан ривоят қилинган ҳадисда Расулуллоҳ соллаллоҳу алайҳи васаллам дедилар: “Энг афзал садақа Рамазондаги садақадир”. “Рамазон ойида нафақа қилишда хурсанд бўлинглар.Чунки у ойдаги нафақа худди Аллоҳ йўлида инфоқ қилинган кабидир”. Салмон Форсий розияллоҳу анҳу ривоят қилган ҳадисда эса Расулимиз, “Ким бу ойда яхши хислатлардан бирини ихтиёр қилса,у худди бошқа ойларда битта фарзни адо қилган каби бўлади. Ким унда битта фарзни бажарса, у худди бошқа ойларда етмишта фарзни адо қилган каби бўлади”, деб айтганлар.

Юқоридаги ҳадислардан кўриниб турибдики, Рамазон ойини ғанимат билиб муҳтож инсонларни қалбига хурсандчилик ато қилиб, хайрли амалларда бўлмоғимиз ушбу синовли кунларда бир-биримизни қўллаб қувватламоғимиз лозим бўлади.

Аллоҳ таоло Қуръони каримда “Мунофиқун” сурасининг 10-оятида марҳамат қилади: “Ва бирингизга ўлим келиб: “Эй Роббим, агар менинг ўлимимни яқин муддатга орқага сурсанг, бас садақа қилиб солиҳлардан бўлсам”, демасдан аввал Биз сизларга ризқ қилиб берган нарсалардан нафақа қилинг”.

Ушбу ояти каримада ҳам Яратган эгамиз орқамизда қолган мол дунёмизни ҳисоб китоби оғир эканлигини ҳақида ишора бериб “қанийди, менга бир оз муҳлат берсанг, орқамга қайтиб садақаларни қилиб солиҳлардан бўлишликни сўраб қолишлигимиздан огоҳлантиряпти. Аммо энди инсон ўлганидан кейин ҳеч қачон ортга қайтиш бўлмайди. Шунинг учун тириклигимизда садақа қилишга шошилмоғимиз ва Яратганнинг солиҳ бандаларидан бўлмоғимиз зарур экан.

Абу Ҳурайра розияллоҳу анҳу ривоят қилган ҳадисда Расулимиз айтдилар: “Бир фосиқ аёл бор эди, у қудуқ олдидан ўтаётиб чанқоқликдан халлослаб, ўлишга яқин бўлиб турган бир итни кўрди. У аёл махсисини ечди ва рўмолига боғлаб қудуқдан сув тортиб итни суғорди. Шу иши сабабли Аллоҳ у аёлни ўз раҳматига олиб мағфират қилди, дедилар. Шунда саҳобалардан бири: “Ё Расулалоҳ, бизга ҳайвонларда ҳам савоб борми?”, деди. Расулуллоҳ айтдилар: “Ҳар бир хўл жигар эгаси борки, қилинган яхшиликда ажр бор дедилар”.

Ушбу ҳадисда биз умматларга жуда кўп ҳикматлар бор. Аввало бир фосиқ аёл итни суғоргани учун мағфират қилинишлиги бир ҳайвондаки қилинган яхшиликда ажр савоб бор экан, азизлар мана шундай имтиҳон кунларда карантин туфайли ўз ишини, тирикчилик сабабини йўқотган муҳтожларга қилинган яхшиликда жуда катта ажр савоблар бордир. Юқоридаги муборак сўзлардан хулоса қилиб, Аллоҳ таола барчаларимизни ушбу ойни ғанимат билиб садақага шошилмоғимизга ўзи тавфиқ, ҳидоят берсин!

Бозорали ХОМИДОВ,
Қува тумани “Қўшкечик” масжиди имом-хатиби

“Рамазон ойики, унда одамларга ҳидоят ҳамда ҳидояту фурқондан иборат очиқ баёнотлар бўлиб Қуръон тушурилгандир. Сиздан ким у ойда ҳозир бўлса, рўзасини тутсин. Ким бемор ёки сафарда бўлса, бас саноғини бошқа кунларда тутадир. Аллоҳ сизларга енгилликни хоҳлайди ва сизларга қийинликни хоҳламас. Саноғини мукаммал қилишингиз ва сизни ҳидоятга бошлаган Аллоҳни улуғланишнгиз учун. Шоядки, шукр қилсаларингиз” (Бақара сураси, 185 оят).

Пайғамбаримиз алайҳиссаломдан ривоят қиладилар: “Ҳар ким муборак Рамазон ойи келганидан хурсанд бўлса, Аллоҳ таоло у банданинг жасадига дўзах оловини ҳаром қилади” дедилар (Имом Муслим ривояти).

Ривоят қилинадики, Аллоҳ таоло Рамазоннинг ҳар кечасида уч маротаба, ҳожатини сўрагувчилар борми, ҳожатини раво қилурман, тавба қилувчилар борми, тавбасини қабул қилурман, кечиришни истагувчилар борми, уларни мағфират этаман, деб марҳамат этар экан.

Шундай экан, азиз биродарлар, ҳурматли мўмин-мусулмонлар! Бу муборак Рамозон ойининг ҳурматини сақлайлик, ушбу ойда кўп-кўп ибодатлар қилиб тилимизни ёлғондан, ғийбатдан, иғволардан муҳофаза этиб, мўмин-мусулмон биродарларимизга нисбатан ҳасаду адоват қилишдан сақланишимиз лозим. Тутган рўзамиз даргоҳи илоҳийга қабул бўлиши учун доимо худодан қўрқиб, тавозели бўлиб ва яхшилик қилишликни истамоқлик даркор.

Яна шунингдек, бугунги кунда Аллоҳнинг бир синови ўлароқ, бутун ер юзи бўйлаб тарқалган коронавирус пандемияси муносабати билан ҳукуматимиз шахсан муҳтарам Президентимиз томонларидан қабул қилинган Қарорларга ҳамда Ўзбекистон мусулмонлари идораси Уламолар Кенгашининг қабул қилган Фатволарига итоат этиб, Рамазон кунларида таровеҳ намозларини ҳар ким ўз оиласида адо этиши ҳамда қилиниши кўзланган ифторлик зиёфатлари ўрнига шу зиёфат учун сарф этиладиган маблағларни ёрдамга муҳтож, боқувчисини йўқотган, етим-есирларга бериш айни савоб эканлигини ҳис этишимиз керак. Аллоҳ таоло Қуръони каримнинг  Нисо сураси 59-оятида марҳамат қилганидек “Эй, иймон келтирганлар! Аллоҳга итоат қилинг, пайғамбарга ва ўзингиздан бўлган иш бошиларга итоат қилинг” деб марҳамат қилган.

Барчаларимиз амалдаги карантин қоидаларига амал қилиб, Рамазони шариф кунларида ҳам оиламиз бағрида фарзандларимизга китоб ўқишни ҳамда ойнаи жаҳон орқали онлайн тариқасида берилаётган хатми Қуръонларни мунтазам равишда кўриб боришларини таъминлашимиз даркор.

Муборак Рамазон кунларида Яратгандан бутун дунёга тарқалган ушбу касалликни тезроқ даф этишини сўраб дуолар қилайлик. Аллоҳ таоло юртимизга  тинчлик, хотиржамлик, фаровон ҳаёт насиб этсин! Рамазон ойида тутадиган рўзларимизни, хайри эҳсонлармизни ўзи даргоҳида мақбул айласин!

Қурбонали ПИРМАТОВ,
Бешариқ тумани “Узун” масжиди имом-хатиби