қиз бола – Alhidoya.uz

Қизингизни шундай дуо қилганмисиз?

Alhidoya.uz таҳририяти — Fri, 20 Sep 2024 12:27:47 +0000

Бисмиллаҳир Роҳманир Роҳийм

Саҳоба Жулайбиб розияллоҳу анҳунинг оила қуриши ҳақидаги воқеани тарих китобларидан ўқиб олишингизни тавсия қиламиз.

Жулайбиб розияллоҳу анҳунинг никоҳини Расулуллоҳ соллаллоҳу алайҳи васаллам ўқидилар. Икки ёшнинг никоҳига баракалар тилаб, бундай дуо қилдилар:

اللهُمَّ صُبَّ عَلَيْهَا الْخَيْرَ صَبًّا وَلَا تَجْعَلْ عَيْشَهَا كَدًّا كَدًّا

Ўқилиши: Аллоҳумма субба ъалайҳал хойра соббан ва лаа тажъал ъайшаҳа каддан каддан.

Маъноси: Аллоҳим, уларга яхшиликларни ёғдиргин, турмушларида машаққат кўрсатмагин.

Анас ибн Молик розияллоҳу анҳу Жулайбиб розияллоҳу анҳунинг аёли ҳақида: “Мадинада ундан кўра саховатли аёл йўқ эди”, дейди.

Муҳтарам оталар, сиз ҳам қизингизни бугундан бошлаб шундай дуо қилишни унутманг!

Даврон НУРМУҲАММАД

***

Bismillahir Rohmanir Rohiym

Sahoba Julaybib roziyallohu anhuning oila qurishi haqidagi voqeani tarix kitoblaridan o‘qib olishingizni tavsiya qilamiz.

Julaybib roziyallohu anhuning nikohini Rasululloh sollallohu alayhi vasallam o‘qidilar. Ikki yoshning nikohiga barakalar tilab, bunday duo qildilar:

اللهُمَّ صُبَّ عَلَيْهَا الْخَيْرَ صَبًّا وَلَا تَجْعَلْ عَيْشَهَا كَدًّا كَدًّا

O‘qilishi: Allohumma subba ’alayhal xoyra sobban va laa taj’al ’ayshaha kaddan kaddan.

Ma’nosi: Allohim, ularga yaxshiliklarni yog‘dirgin, turmushlarida mashaqqat ko‘rsatmagin.

Anas ibn Molik roziyallohu anhu Julaybib roziyallohu anhuning ayoli haqida: “Madinada undan ko‘ra saxovatli ayol yo‘q edi”, deydi.

Muhtaram otalar, siz ham qizingizni bugundan boshlab shunday duo qilishni unutmang!

Davron NURMUHAMMAD

“Қизимни мингта ўғилга алишмайман”

Alhidoya.uz таҳририяти — Tue, 23 Jan 2024 06:49:46 +0000

Отам оддий деҳқон бўлганлари учун оиламиз ўта фиқирлик билан кун кечирган. Лекин ота-онам узоқ йил фарзанд қўришмагани учун деҳқонлик қилиб топган пуллари эр-хотиннинг тирикчилигига кифоя қилган, икковлон борига қаноат қилиб яшашган экан. Кейин мен туғилдим. Онам мени дунёга келтирганларида ёшлари 40 дан ошган экан.

Узоқ кутилган фарзанд ўғилми, қизми одатда фарқи бўлмайди. Инсон тирноққа зор бўлганда, одамларнинг гап-сўзларидан кўз очолмай қолганда ҳатто ўлик бўлса ҳам фарзанд кўргиси келади, Аллоҳдан ёлвориб шуни сўрайди. Лекин кексаликка қараб кета бошлаган отамга ёнларида турадиган, деҳкончилик ишларида белларига мадор бўладиган фарзанднинг ўғил бўлиши ҳар жиҳатдан яхши эди. Шунинг учун қалбларининг бир четида кутилаётган гўдак ўғил бўлишини сўраган бўлсалар ҳам ажаб эмас. Доя аёл ҳам буни сезган шекилли, менинг қиз бола эканимни дадамга бир оз маҳзунлик ила билдирган экан. Одатда оталар ўғил фарзанднинг суюнчи пулини кўпроқ қилиб беришар экан. Аммо дадам менинг туғилганим хабарини эшитганарида доя аёлга ўғил болаларга бериладиган пулдан кўпроқ пул берган эканлар. Доя аёл буни сира кутмабди. Отам мени бағриларига босиб “Ўғил бола бўлганда бунчалик хурсанд бўлмасдим” деганларида доя аёл ҳайратдан карахт бўлаёзган экан.

Бу ҳикояни мен дадамдан кўп эшитганман. Ҳар гал айтиб берганларида ўзгача ҳаяжон билан ҳикоя қилардилар. Менга бу ҳикояни эшитиш жуда ёқарди. Айниқса “Сени бағримга босиб доя аёлга шундай шундай дедим” деган жойларида бир кўз ёши қилиб олардилар. Онам ҳам бу ҳикояни кўзларида ёш, лекин нимтабассум билан эшитардилар. Туғилиш қиссам мени доимо яхши ишларга, яхши инсон бўлишга, ота-онамнинг хизматларини қилишга, уларнинг қадрига етишга, айниқса дадамнинг белларига қувват бўлишимга илҳомлантирарди.

Бу истаклар менинг бутун ҳаётим мазмунига, мақсадига айланган эди. Аллоҳга шукрлар бўлсинки, мен ҳаётим давомида отамга кўп раҳматлар эшиттирдим. Мен билан фахрланишларига, инсонлар олдида бошларини баланд тутишларига сабабчи бўладиган кўп ишлар қилдим. Отам вафот этгунларича “Бу қизимни мингта ўғилга алишмайман” дея яшадилар.

Мени ўқиш ва ишларимда муваффақиятга эришишимга отамнинг меҳрларига, ҳали туғилмасимдан илгари тўла бўлган муҳаббат қучоқларига тўйиб ўсганим сабаб бўлди. Тўғри, отам мени маликалардек моддий таъминламадилар, лекин менга маликалар ҳам кўрмайдиган икром, ғамхўрлик ва севгини кўрсатдилар. Аллоҳ отамнинг гуноҳларини кечириб, жаннатлари ила сийласин!

Доктор Абдуллоҳ Муҳаммад Абдулмуътининг
«Фарзанд тарбиясида 700 та сабоқ» китобидан
Ғиёсиддин Ҳабибуллоҳ, Камронбек Ислом таржимаси.

Қиз бола узоқ мамлакатда ўқиши жоизми?

Alhidoya.uz таҳририяти — Sun, 09 May 2021 04:04:33 +0000

Савол: Ассалому алайкум!
— Қизим чет элда ўқишни жуда истайди. У жуда ҳам аълочи. Дадаси ва акалари “қиз бола маҳрамсиз чет мамлакатга бориши мумкин эмас” дея рухсат беришмаяпти. Аммо мен илм олиш ниятида қиз бола узоқ мамлакатда ўқиши жоизлиги ҳақида ўқигандим. Динимизда бу масаланинг ҳукми аслида қандай?

Жавоб: Ва алайкум ассалом!
— Ислом дини, энг нозик хилқат саналмиш аёлларнинг иффати ва иззат-обрўларига катта аҳамият берган. Аёл қизларимизнинг таълим олишлари мақтовга сазовор. Лекин ҳар қандай яхши иш ҳам динимиз кўрсатмасига мувофиқ бўлиши лозим. Шариатимизга кўра пиёда юрганда уч кеча-кундузлик масофага – сафар масофаси дейилади. Ана шу сафар масофасича бўлган жойга аёл-қизларимиз ўз маҳрамлари билан биргаликда сафарга чиқишлари лозим. Бу ҳақида Пайғамбаримиз Муҳаммад алайҳиссалом шундай деганлар: “Аллоҳга ва охират кунига имон келтирган аёл учун уч кунлик ва ундан ортиқ масофага отаси ёки ўғли ёки эри ёки ака-укаси ёки маҳрам қариндошисиз сафар қилиши ҳалол бўлмайди”.

Шундан келиб чиқиб, илм олиш ниятида бўлган қизингизни маҳрам қариндоши билан биргаликда ўқишга юборишингиз мақсадга мувофиқ бўлади. Валлоҳу аълам.

ЎМИ Фатво ҳайъати