ЎзА

Меҳмонлар Пайариқ туманидаги Имом Бухорий қадамжосини зиёрат қилди. Айни пайтда бу ерда амалга оширилаётган реконструкция жараёнлари, зиёрат туризми учун яратилаётган шароитлар ҳақида батафсил маълумот берилди.

Ислом тараққиёт банки президенти Имом Бухорий халқаро илмий-тадқиқот маркази фаолияти билан ҳам яқиндан танишди.

Давлатимиз раҳбари ташаббуси билан ташкил этилган марказда буюк муҳаддис ва алломалар илмий меросини ўрганиш борасида олиб борилаётган ишлар, нодир қўлёзма асарлар сақланаётган кутубхона ва музей меҳмонларда катта таассурот қолдирди. Ислом цивилизацияси ривожига улкан ҳисса қўшган Мовароуннаҳр алломалари илмий меросини чуқур ўрганиш ва кенг тарғиб этиш борасидаги ҳамкорлик алоқаларини кучайтириш истиқболлари тўғрисида ўзаро фикр алмашилди.

– Имом Бухорий халқаро илмий-тадқиқот маркази жамоасининг илм йўлида эришаётган муваффақиятларини Ўзбекистонда диний-маърифий соҳада олиб борилаётган кенг кўламли ислоҳотларнинг яққол самараси сифатида баҳолайман ва Марказнинг ислом дини ривожи йўлида амалга ошираётган хизматларини ҳар томонлама қўллаб-қувватлайман, – деди Муҳаммад ал-Жассир жаноблари.

Шунингдек, юқори мартабали меҳмон марказнинг фахрий меҳмонлар китобида ҳам ўз дил сўзларини ёзиб қолдирди.

Жумладан, Ислом тараққиёт банки президенти Муҳаммад Сулаймон ал-Жассир “Имом Бухорий ҳаёти ва илмий фаолиятини кенг оммага етказиш йўлида Имом Бухорий халқаро илмий-тадқиқот марказида амалга оширилаётган самарали ишларни кўриб жуда мамнун бўлдим. Марказнинг хайрли ишларида улкан муваффақиятлар тилаб қоламан” деб ўз дастхатини қолдирди.

Ғ.ҲАСАНОВ, ЎзА

Президент сўзи аввалида йиғилганларни Ўзбекистонда кўриб турганидан мамнунлигини билдирди.

“Албатта, Банкнинг йиллик анжумани Тошкентда ўтказилиши ўзига хос рамзий маънога эга. Биз буни Ўзбекистоннинг ислом дунёси ривожига қўшган ҳиссаси, шунингдек, мамлакатда сўнгги 5 йил давомида олиб борилаётган изчил ислоҳотларнинг эътирофи деб ҳисоблаймиз”, – деди Шавкат Мирзиёев.

Давлат раҳбари ўз сўзида пандемия бўлишига қарамай, анжуманни жонли равишда ўтказишга имкон бўлганини қайд этди.

“Ўзбек халқининг буюк аждоди, бутун мусулмон оламининг улуғ намояндаси имом Ал-Бухорий ҳазратлари жамлаган “Саҳиҳи Бухорий” китобида зикр этилган ҳадиси шарифда айтилганидек, “Албатта, амаллар ниятга боғлиқдир”.

Барчамиз холис ният қилган эканмиз, Яратганнинг марҳамати билан бугун Ислом Тараққиёт Банки гуруҳининг йиллик учрашувини жонли равишда ўтказишга муваффақ бўляпмиз.

Таъкидлаш жоизки, мазкур тадбир пандемия бошлангандан бери дунёдаги халқаро молиявий институтлар орасида биринчи бўлиб ташкил этилган нуфузли анжумандир”, – дея таъкидлади президент.

Шавкат Мирзиёев Ислом Тараққиёт Банкининг янги президенти этиб сайланган Сулаймон Ал-Жассирни қутлади.

“Менга берилган ушбу қулай имкониятдан фойдаланиб, Ислом Тараққиёт Банкининг барча аъзо давлатлари вакиллари номидан ҳурматли биродаримиз – Ал-Жассир жанобларини банк президенти лавозимида иш бошлагани билан муборакбод этаман.

Муҳтарам Ал-Жассир жаноблари! Бу юксак лавозимдаги фаолиятингизни Ўзбекистонга ташрифдан бошлаётганингиз чуқур рамзий маънога эга. Шу сабабли юртимиз билан ҳамкорлик Сизнинг масъулиятли ва шарафли фаолиятингизнинг муҳим қисмига айланади, деб ишонаман.

Мамлакатимиз тимсолида Сиз яқин ҳамкор ва садоқатли дўст топдингиз, десам, муболаға бўлмайди. Зиммангиздаги эзгу вазифани адо этишда Аллоҳ таоло Сизни ҳамиша қўлласин!” – деди Ўзбекистон президенти.

«OIC Today» журнали 2003 йилда ташкил этилган бўлиб, у Ислом ҳамкорлик ташкилотининг (ИҲТ) Халқаро бизнес маркази гуруҳи таркибига киради. Журнал ИҲТга аъзо давлатлар ўртасида, шунингдек, Жанубий Корея, Япония, Мяньма ва Буюк Британияда тарқатилади.

Музокаралар чоғида Малайзия томони Ўзбекистон мустақил тараққиётининг асосий ютуқлари, шунингдек, бўлажак Президент сайловига тайёргарлик ишлари билан атрофлича таништирилди.

Бундан ташқари, суҳбатдошга 31 августдан 4 сентябрга қадар Тошкентда ўтказиладиган ИТБ Бошқарувчилар кенгашининг йиллик йиғилиши ҳақида маълумот берилди.

Хусусан, йиллик йиғилишда ИТБга аъзо мамлакатларнинг молия, иқтисодиёт, режалаштириш ва халқаро ҳамкорлик учун масъул ҳукумат аъзолари ва вазирлари, Марказий банклар раҳбарлари ва бошқа мансабдор шахслари, шунингдек, кўп томонлама ривожланиш банклари, халқаро ривожланиш ташкилотлари, бизнес, фуқаролик жамияти, оммавий ахборот воситалари ва бошқа манфаатдор томонларнинг юқори мартабали вакиллари иштирок этиши маълум қилинди. Йиллик анжуманда жами 2000 дан ортиқ иштирокчи қатнашиши кутилмоқда.

COVID-19 шароитида барқарорликни ошириш, глобал иқтисодий тикланишнинг йўли сифатида барқарор қўшилган қиймат занжирларини тиклаш, ёшларни ҳар томонлама ривожлантириш, иш ўринларини яратиш ва бошқа қатор долзарб мавзулар кўтарилади. Шунингдек, ИТБ ҳузуридаги Трансформация жамғармаси томонидан турли соҳаларда «Эртанги кун инновациялари» тақдимоти ташкил этилади.

Толиб Абдуллоҳ Ўзбекистонда иқтисодиётни янада эркинлаштириш ва модернизация қилишга қаратилган кенг кўламли ислоҳотларга юқори баҳо бериб, «OIC Today» журнали республиканинг Куала-Лумпурдаги дипломатик миссияси билан конструктив ҳамкорликни давом эттиришга тайёрлигини билдирди.
Музокаралар натижасида «OIC Today» журналида Ўзбекистон ҳақидаги материалларни чоп этиш бўйича ҳамкорликни фаоллаштириш бўйича келишувга эришилди.

Инвестициялар ва ташқи савдо вазирлиги (ИТСВ) манбасига кўра, йиғилишда анжуманга тайёргарлик кўриш бўйича чора-тадбирларнинг амалга оширилиши кўриб чиқилди.

Ташкилий қўмитанинг тегишли кичик ишчи гуруҳлари раҳбарлари бажарилган ишлар юзасидан ҳисобот ва турли йўналишларда ташкилий масалаларни ҳал этишнинг бугунги ҳолати ҳақида маълумот берди.

Мамлакатимизнинг халқаро майдондаги имижини мустаҳкамлаш, ИТБ Гуруҳи ва бошқа ривожланиш ҳамкорлари билан муносабатларни янада чуқурлаштириш нуқтаи назаридан тадбирни юқори ташкилий ва мазмун жиҳатидан юқори савияда ўтказиш муҳимлиги таъкидланди.

Тадбир иштирокчилари ва меҳмонларининг хавфсизлигини таъминлаш мақсадида кўзда тутилган барча санитария-эпидемиология тадбирларига риоя этиш зарурлиги алоҳида қайд этилди.

Шунингдек, учрашувда ҳал этилиши тегишли вазирлик ва идораларнинг ўзаро мувофиқлаштирилган ҳамкорлигини талаб этувчи бир қатор масалалар кўриб чиқилди. Уларни муҳокама этиш давомида ўзаро ҳамкорлик алгоритмлари ишлаб чиқилди ва масъул раҳбарларга манзилли кўрсатмалар берилди.

Бошқарувчилар Кенгаши ҳамда Икки муқаддас масжид ходими, Подшоҳ Салмон ибн Абдулазиз Ол Сауд ва Саудия Арабистони Подшоҳлиги ҳукуматига ИТБни ташкил этилганидан буён қўллаб-қувватлаб келаётгани учун ўзининг чуқур миннатдорлигини билдириши хусусида қарор қабул қилди.

Қарорда доктор Бандар ибн Муҳаммад Ал-Ҳажар Жаноби Олийлари томонидан сайланганидан буён ИТБ тузилмалари ва ИТБ Гуруҳи олдида амалга оширилган мукаммал фаолияти ҳамда ўтган давр мобайнида жаҳон молия бозорларидаги молиявий ташкилотлар орасида ўз мавқеини кўтаришга имкон берган улкан муваффақиятлари Банк Бошқарувчилари Кенгаши томонидан эътироф этилгани ва юқори баҳолангани акс эттирилган.

Маълумот учун, янги президент – Муҳаммад Сулаймон ал-Жассир Калифорния университетида иқтисодиёт бўйича фалсафа доктори (PhD) даражасини олган. 2009-2011 йилларда Саудия Арабистони Марказий банки раиси, 2011-2015 йилларда Саудия Арабистони иқтисодиёт ва режалаштириш вазири лавозимларида ишлаган; айни пайтда подшоҳлик Вазирлар Кенгаши Бош котибиятида маслаҳатчи сифатида фаолият юритмоқда.

ИТБ – 57 та ҳиссадор аъзо иштирокидаги, ислом молиясини қўллаб-қувватловчи халқаро молиявий институт. 1973 йилда ташкил этилган, бош штаб-квартираси Жидда шаҳрида.

Kun.uz маълумотига кўра, ушбу банк – Ўзбекистоннинг асосий 10 та кредиторлари қаторида туради. 2021 йил 1 апрель ҳолатига, Ўзбекистон давлат ташқи қарзининг 0,9 млрд доллари Ислом тараққиёт банкига тўғри келади.

Эслатиб ўтамиз, аввалроқ, ўтган йилнинг октябрь ойида С.Умурзаков Европа тикланиш ва тараққиёт банки (ЕТТБ) Бошқарувчилари Кенгаши Раисининг ўринбосари этиб сайланган эди.

Маълумот учун: ўз ичига Ислом тараққиёт банки, Хусусий секторни ривожлантириш бўйича ислом корпорацияси, Халқаро ислом савдо-молия корпорацияси, Инвестициялар ва экспорт кредитларини суғурталаш ислом корпорацияси ва Ислом тадқиқот ва таълим институтини олган Ислом тараққиёт банки Гуруҳи 1974 йилда Жидда (Саудия Арабистони) шаҳрида ташкил этилган. ИТБ аъзолари таркибига 57 мамлакат киради. Банк фаолиятининг асосий йўналиши иқтисодиётнинг стратегик тармоқларида йирик инфратузилмавий ва ижтимоий аҳамиятга эга лойиҳаларни молиялаштиришдир.