Савол: Турмуш қурганимизга 10 йил бўлди. 4 та фарзандимиз бор, лекин ҳалиям ўғилларини мандан қизғониб, арзимаган нарсалардан жанжал чиқариб, бизни тинч қўйишмайди. Иккимиз ҳам бундан чарчадик, аммо ажрашишни ҳам истамаймиз. Бир-биримизни яхши кўрамиз, нима қилишни билмаяпмиз. Шу масалада ёрдам берсангиз, илтимос.
Жавоб: Бу саволда қайнона-келин орасидаги муаммо сўраляпти шекилли. Аввало, келинлар модомики, ўша қайноналарнинг ўғиллари билан яшар эканлар, ўғлини яхши кўрар эканлар, қайнонани кўнглини олишни ҳам уддалашлари лозим. Бомаслаҳат иш қилсинлар. Қайноналарни кўз ўнгида келин-куёвлар ҳеч қачон ҳазил-мутойиба қилмасликлари лозим. Ҳазил-мутойибалар ётоқхонада бўлмоғи керак. Ўғлини келиндан қизғонадиган қайноналар кўз ўнгида ўғиллар келинларга (мувозанатни сақлаш, хотиржам яшаш, ҳар кун жанжал бўлавермаслигини таъминлаш мақсадида) ўзларини гўёки хотинини ёқтирмайдигандек тутиб, кўз учун бироз тил учида қаттиқроқ тергаб туришлари ҳам фойда беради. Шундай қилсалар, қайноналар келинини ҳимоя қилиб, ўғилларини койий бошлайдилар. Оналар яхши ниятли бўладилару барибир келин масаласида аёллик табиатлари кўп ҳолларда устун келиб қолиши, ўғлини рашк қилиши бор нарса. Келинлар ҳам орани ислоҳ қилиш ниятида қайноналарига гўёки дардини изҳор қилаётгандек, эрлари уларга бепарвороқ эканини айтиб, гарчи ундай бўлмаса ҳам бироз шикоят қилиб турсалар, бу ҳам қайнонанинг келинга муносабатини яхшилайди.
ЎМИ фатво ҳайъати
