Фазилатли ой муносабати билан амалга оширилаётган хайрли ишлардан яна бири — юртимиз масжидларида ўтказилаётган хатми Қуръон тадбирларидир. Рамазон ойи давомида масжидларда Қуръони каримни тўлиқ хатм қилиб ўқиш анъанаси изчил давом этмоқда. Бу эзгу амалларда фаол иштирок этаётган қориларнинг хизматлари ҳам муносиб қадрланмоқда.

Хусусан, Давлатимиз раҳбарининг ташаббуслари билан масжидларда хатми Қуръон ўқиб келаётган қориларга Ўзбекистон Республикаси Президентининг ҳадялари тақдим қилинди. Ушбу ҳадялар Вақф хайрия жамоат фонди томонидан уларга етказилди. Бу эътибор ва ғамхўрлик қориларнинг хизматларини қадрлаш, уларни қўллаб-қувватлаш ҳамда халқимиз орасида Қуръони каримга бўлган муҳаббат ва эҳтиромнинг ёрқин намунасидир.

***

Muborak Ramazon oyi yurtimizda ezgulik, mehr-oqibat va saxovat oyi sifatida keng nishonlanmoqda. Bu muborak oyda aholining ijtimoiy himoyaga muhtoj qatlamlarini qo‘llab-quvvatlash, ular holidan xabar olish va moddiy-maʼnaviy yordam ko‘rsatishga alohida eʼtibor qaratilmoqda. Joylarda tashkil etilayotgan xayr-saxovat tadbirlari insonlar o‘rtasida hamjihatlik va bag‘rikenglik muhitini yanada mustahkamlamoqda.

Fazilatli oy munosabati bilan amalga oshirilayotgan xayrli ishlardan yana biri — yurtimiz masjidlarida o‘tkazilayotgan xatmi Qurʼon tadbirlaridir. Ramazon oyi davomida masjidlarda Qurʼoni karimni to‘liq xatm qilib o‘qish anʼanasi izchil davom etmoqda. Bu ezgu amallarda faol ishtirok etayotgan qorilarning xizmatlari ham munosib qadrlanmoqda.

Xususan, Davlatimiz rahbarining tashabbuslari bilan masjidlarda xatmi Qurʼon o‘qib kelayotgan qorilarga O‘zbekiston Respublikasi Prezidentining hadyalari taqdim qilindi. Ushbu hadyalar Vaqf xayriya jamoat fondi tomonidan ularga yetkazildi. Bu eʼtibor va g‘amxo‘rlik qorilarning xizmatlarini qadrlash, ularni qo‘llab-quvvatlash hamda xalqimiz orasida Qurʼoni karimga bo‘lgan muhabbat va ehtiromning yorqin namunasidir.

Бисмиллаҳир Роҳманир Роҳийм

Жумладан, Марғилон шаҳар “Хонақоҳ” масжиди масъуллари томонидан шаҳарнинг Дўстлик маҳалласида яшовчи Ҳамидиллоҳ Мамажонов хонадонида ифторлик дастурхони ёзилди. Ушбу тадбирда маҳалла аҳли, нуронийлар ва фаоллар иштирок этиб, Рамазон ойининг фазилатлари ҳақида самимий суҳбатлар бўлиб ўтди.

Ифторлик тадбирида Фарғона вилояти бош имом-хатиби Убайдуллоҳ домла Абдуллаев ҳам иштирок этди. У киши хонадон эгалари ва маҳалла аҳли билан мулоқот қилиб, муборак Рамазон ойининг инсон ҳаётидаги аҳамияти, сабр, шукр ва саховат каби фазилатларнинг фазилати ҳақида маърифий суҳбат олиб борди. Шунингдек, йиғилганларни ўзаро аҳил-иноқ яшашга, эзгу ишларга интилишга даъват этди.

Самимий муҳитда ўтган мазкур ифторлик дастурхонида дуолар қилинди. Бундай хайрли тадбирлар аҳоли ўртасида меҳр-оқибатни мустаҳкамлаш, юрт тинчлиги ва фаровонлиги учун қилинган эзгу дуолар билан янада мазмунли кечди.

***

Muborak Ramazon oyi yurtimizda mehr-oqibat, saxovat va hamjihatlik fazilatlarini yanada yuksaltirmoqda. Bu muborak oyda aholi o‘rtasida hamjihatlikni mustahkamlash, xonadonlarga fayzu baraka ulashish maqsadida turli xayrli tadbirlar, suhbatlar va iftorliklar tashkil etilmoqda.

Jumladan, Marg‘ilon shahar “Xonaqoh” masjidi masʼullari tomonidan shaharning Do‘stlik mahallasida yashovchi Hamidilloh Mamajonov xonadonida iftorlik dasturxoni yozildi. Ushbu tadbirda mahalla ahli, nuroniylar va faollar ishtirok etib, Ramazon oyining fazilatlari haqida samimiy suhbatlar bo‘lib o‘tdi.

Iftorlik tadbirida Farg‘ona viloyati bosh imom-xatibi Ubaydulloh domla Abdullayev ham ishtirok etdi. U kishi xonadon egalari va mahalla ahli bilan muloqot qilib, muborak Ramazon oyining inson hayotidagi ahamiyati, sabr, shukr va saxovat kabi fazilatlarning fazilati haqida maʼrifiy suhbat olib bordi. Shuningdek, yig‘ilganlarni o‘zaro ahil-inoq yashashga, ezgu ishlarga intilishga daʼvat etdi.

Samimiy muhitda o‘tgan mazkur iftorlik dasturxonida duolar qilindi. Bunday xayrli tadbirlar aholi o‘rtasida mehr-oqibatni mustahkamlash, yurt tinchligi va farovonligi uchun qilingan ezgu duolar bilan yanada mazmunli kechdi.

Шу каби хайрли тадбирлардан бири Туркия Республикасининг Анқара шаҳрида ўтказилди. Ўзбекистон Республикасининг Туркиядаги элчихонаси ҳамда Ўзбекистон мусулмонлари идораси ҳамкорлигида ватандошлар учун маънавий учрашув ва ифторлик дастурхони ташкил этилди. Тадбирда Туркиянинг турли ҳудудларида меҳнат қилаётган юртдошлар иштирок этиб, муборак Рамазон ойининг фазилатлари ҳақида маърифий суҳбатлар ташкил этилди.

Учрашув давомида иштирокчиларга Рамазон ойининг инсон маънавиятини юксалтиришдаги аҳамияти, сабр, шукр ва саховат каби фазилатларни мустаҳкамлашдаги ўрни ҳақида фикрлар билдирилди.

Мазкур тадбирда Фарғона шаҳар бош имом-хатиби Жўрабек домла Рахмонов ҳам иштирок этди. У киши учрашув давомида Рамазон ойининг фазилатлари, мусулмон инсоннинг ҳаётидаги маънавий тарбия ва юртга садоқат каби масалалар хусусида маърифий суҳбат ўтказди. Шунингдек, ватандошларни илм олиш, ҳалол меҳнат қилиш ва миллий ҳамда диний қадриятларимизга содиқ бўлиб яшашга даъват этди.

Тадбир сўнггида барча иштирокчилар учун ифторлик дастурхони ёзилиб, биргаликда дуолар қилинди. Самимий муҳитда ўтган мазкур учрашув ватандошлар қалбида катта мамнуният уйғотиб, уларни янада бирлаштиргани билан аҳамиятли бўлди.

Бундай маънавий тадбирлар хорижда яшаётган юртдошларимизнинг юртимиз билан алоқасини мустаҳкамлаш, миллий ва диний қадриятларимизни асраб-авайлаш ҳамда уларни эзгулик ва бирдамлик руҳида тарбиялашда муҳим аҳамият касб этади.

***

Muborak Ramazon oyi nafaqat yurtimizda, balki xorijda yashayotgan vatandoshlarimizning ham qalblarini yaqinlashtirib, ularni ezgulik va birdamlik atrofida jam etmoqda. Ayni shu muborak oy munosabati bilan xorijda bo‘lib turgan yurtdoshlar bilan turli maʼnaviy-maʼrifiy tadbirlar, uchrashuv va suhbatlar tashkil etilmoqda. Bunday tadbirlar vatandoshlarimizning milliy va diniy qadriyatlarga bo‘lgan muhabbatini mustahkamlash, ularni yurt bilan bog‘lab turuvchi maʼnaviy rishtalarni yanada kuchaytirishga xizmat qilmoqda.

Shu kabi xayrli tadbirlardan biri Turkiya Respublikasining Anqara shahrida o‘tkazildi. O‘zbekiston Respublikasining Turkiyadagi elchixonasi hamda O‘zbekiston musulmonlari idorasi hamkorligida vatandoshlar uchun maʼnaviy uchrashuv va iftorlik dasturxoni tashkil etildi. Tadbirda Turkiyaning turli hududlarida mehnat qilayotgan yurtdoshlar ishtirok etib, muborak Ramazon oyining fazilatlari haqida maʼrifiy suhbatlar tashkil etildi.

Uchrashuv davomida ishtirokchilarga Ramazon oyining inson maʼnaviyatini yuksaltirishdagi ahamiyati, sabr, shukr va saxovat kabi fazilatlarni mustahkamlashdagi o‘rni haqida fikrlar bildirildi.

Mazkur tadbirda Farg‘ona shahar bosh imom-xatibi Jo‘rabek domla Raxmonov ham ishtirok etdi. U kishi uchrashuv davomida Ramazon oyining fazilatlari, musulmon insonning hayotidagi maʼnaviy tarbiya va yurtga sadoqat kabi masalalar xususida maʼrifiy suhbat o‘tkazdi. Shuningdek, vatandoshlarni ilm olish, halol mehnat qilish va milliy hamda diniy qadriyatlarimizga sodiq bo‘lib yashashga daʼvat etdi.

Tadbir so‘nggida barcha ishtirokchilar uchun iftorlik dasturxoni yozilib, birgalikda duolar qilindi. Samimiy muhitda o‘tgan mazkur uchrashuv vatandoshlar qalbida katta mamnuniyat uyg‘otib, ularni yanada birlashtirgani bilan ahamiyatli bo‘ldi.

Bunday maʼnaviy tadbirlar xorijda yashayotgan yurtdoshlarimizning yurtimiz bilan aloqasini mustahkamlash, milliy va diniy qadriyatlarimizni asrab-avaylash hamda ularni ezgulik va birdamlik ruhida tarbiyalashda muhim ahamiyat kasb etadi.

Қўқон шаҳридаги “Ўрда” мажмуасида ташкил этилган ифторлик дастурхони ана шундай хайрли тадбирлардан бири бўлди. Унда кексалар, имконияти чекланган ҳамда кам таъминланган фуқаролар таклиф этилди. Тадбирда Фарғона вилояти бош имом-хатиби ўринбосари Алишер домла Наимов ҳамда Қўқон шаҳар бош имом-хатиби Абдумажид домла Исақов иштирок этиб, Рамазон ойининг фазилатлари, бу ойда амалга оширилаётган хайрли ишлар ҳақида сўз юритдилар. Суҳбат давомида юртимиздаги тинчлик-хотиржамлик, осойишталик неъмати нақадар улуғ экани таъкидланиб, мамлакатимиз равнақи ва халқимиз фаровонлиги учун дуолар қилинди.

Бешариқ туманидаги “Ўзбегим” кошонасида ҳам ифторлик дастурхони ёзилиб, унга тумандаги ижтимоий кўмакка муҳтож ва эҳтиёжманд фуқаролар таклиф этилди. Инсон қадрини улуғлаш, муҳтожларга ёрдам кўрсатиш мақсадида ташкил этилган ушбу тадбирда нуронийлар ва жамоатчилик вакиллари дастурхон атрофида жам бўлиб, самимий суҳбат қурдилар. Иштирокчилар юртимизга тинчлик, оилаларга тотувлик ва ҳар бир хонадон дастурхонига қут-барака тилаб дуога қўл очдилар.

Шунингдек, Фарғона вилояти бош имом-хатиби ўринбосари Холмуроджон домла Мамажонов Фарғона шаҳри “Ипак йўли” маҳалласида яшовчи Юлдашевлар хонадонида бўлиб, ифторлик дастурхони ташкил этди. Мулоқот давомида хонадон эгалари билан самимий суҳбатлар олиб борилиб, муборак ойнинг фазилатлари, инсонлар ўртасида меҳр-оқибат ва саховат туйғуларини мустаҳкамлаш зарурлиги ҳақида фикрлар билдирилди. Файзли соатларда юртимиз тинчлиги, халқимиз фаровонлиги ва юртбошимизга куч-қувват тилаб дуолар қилинди.

Дарҳақиқат, бундай хайрли тадбирлар халқимиз ўртасида меҳр-оқибат, бағрикенглик ва ҳамжиҳатлик туйғуларини янада мустаҳкамламоқда. Муборак Рамазон ойида амалга оширилаётган эзгу ишлар ҳар бир инсон қалбида шукроналик ва меҳр туйғуларини уйғотиб, жамиятимизда инсон қадри улуғланаётганининг ёрқин намунаси бўлиб хизмат қилмоқда.

***

O‘tib borayotgan muborak Ramazon oyi yurtimizda mehr-oqibat, saxovat va hamjihatlik muhitini yanada mustahkamlamoqda. Bu fayzli oyda joylarda mehrga muhtoj, imkoniyati cheklangan, kam ta’minlangan oilalar hamda duogo‘y keksalar holidan xabar olinib, ular uchun iftorlik dasturxonlari yozilayotgani Ramazonning barakasini yanada ziyoda etmoqda. Ayniqsa, turli tashkilot va muassasalar tomonidan o‘tkazilayotgan xayriya tadbirlari inson qadrini ulug‘lash, ehtiyojmandlarni qo‘llab-quvvatlashdek ezgu maqsadlarga xizmat qilmoqda.

Qo‘qon shahridagi “O‘rda” majmuasida tashkil etilgan iftorlik dasturxoni ana shunday xayrli tadbirlardan biri bo‘ldi. Unda keksalar, imkoniyati cheklangan hamda kam ta’minlangan fuqarolar taklif etildi. Tadbirda Farg‘ona viloyati bosh imom-xatibi o‘rinbosari Alisher domla Naimov hamda Qo‘qon shahar bosh imom-xatibi Abdumajid domla Isaqov ishtirok etib, Ramazon oyining fazilatlari, bu oyda amalga oshirilayotgan xayrli ishlar haqida so‘z yuritdilar. Suhbat davomida yurtimizdagi tinchlik-xotirjamlik, osoyishtalik ne’mati naqadar ulug‘ ekani ta’kidlanib, mamlakatimiz ravnaqi va xalqimiz farovonligi uchun duolar qilindi.

Beshariq tumanidagi “O‘zbegim” koshonasida ham iftorlik dasturxoni yozilib, unga tumandagi ijtimoiy ko‘makka muhtoj va ehtiyojmand fuqarolar taklif etildi. Inson qadrini ulug‘lash, muhtojlarga yordam ko‘rsatish maqsadida tashkil etilgan ushbu tadbirda nuroniylar va jamoatchilik vakillari dasturxon atrofida jam bo‘lib, samimiy suhbat qurdilar. Ishtirokchilar yurtimizga tinchlik, oilalarga totuvlik va har bir xonadon dasturxoniga qut-baraka tilab duoga qo‘l ochdilar.

Shuningdek, Farg‘ona viloyati bosh imom-xatibi o‘rinbosari Xolmurodjon domla Mamajonov Farg‘ona shahri “Ipak yo‘li” mahallasida yashovchi Yuldashevlar xonadonida bo‘lib, iftorlik dasturxoni tashkil etdi. Muloqot davomida xonadon egalari bilan samimiy suhbatlar olib borilib, muborak oyning fazilatlari, insonlar o‘rtasida mehr-oqibat va saxovat tuyg‘ularini mustahkamlash zarurligi haqida fikrlar bildirildi. Fayzli soatlarda yurtimiz tinchligi, xalqimiz farovonligi va yurtboshimizga kuch-quvvat tilab duolar qilindi.

Darhaqiqat, bunday xayrli tadbirlar xalqimiz o‘rtasida mehr-oqibat, bag‘rikenglik va hamjihatlik tuyg‘ularini yanada mustahkamlamoqda. Muborak Ramazon oyida amalga oshirilayotgan ezgu ishlar har bir inson qalbida shukronalik va mehr tuyg‘ularini uyg‘otib, jamiyatimizda inson qadri ulug‘lanayotganining yorqin namunasi bo‘lib xizmat qilmoqda.

Фарғона шаҳрида Бош прокуратура томонидан ташкил этилган ифторлик дастурхонига кам таъминланган, эҳтиёжманд ва имконияти чекланган фуқаролар таклиф этилди. Унда вилоят ҳокими Х.Бозоров, мутасадди раҳбарлар ҳамда вилоят бош имом-хатиби Убайдуллоҳ домла Абдуллаев иштирок этдилар.

— Мен иккинчи гуруҳ ногирониман. Турли тадбирларга таклиф қилишади, қатнашаман. Аммо бугунги ифторлик ҳар галгидан ҳам самимий ва кўтаринки руҳда ўтди. Юртбошимизга ва ташкилотчиларга раҳмат, — дейди тадбир иштирокчиси Роҳила Усмонова.

Қувасой шаҳрининг “Ҳувайдо” маҳалла фуқаролар йиғинида ҳам самимий ифторлик дастурхони ёзилди. Тадбир 90 ёшли нуроний Мирзажонов Тўрахўжа ота хонадонида бўлиб ўтди. Унда шаҳар ҳокими Зафаржон Тўрақулов, “Нуроний” жамғармаси раиси, Маҳаллалар уюшмаси шаҳар бўлими бошлиғи ҳамда “Ислом” жоме масжиди имом-хатиби Алишер домла Наимов иштирок этдилар.

— Илгари бундай эътиборни кўрмагандим. Ёшим 90 га етган бўлса-да, кўп яхшиликларга гувоҳ бўлдим. Аммо бугунгиси бошқача. Президентимиз соғ бўлсинлар, — дейди Тўрахўжа ота самимий мамнуният билан.

Бағдод туманидаги муҳташам “Орзу” тантаналар саройида ташкил этилган ифторлик дастурхонига тумандаги 56 та маҳалладан таклиф этилган аҳоли вакиллари ва нуронийлар жам бўлиб, самимий суҳбат қурдилар. Дастурхон атрофида юртимиз тинчлиги, халқимиз фаровонлиги ва осойишталиги учун дуолар қилинди.

Қува тумани Тинчлик маҳалласида яшовчи Отажонов Ўлмасжон хонадонида ҳам ҳомийлар томонидан ифторлик дастурхони ёзилди. Унда туман ҳокими Халимжон Умаров, имом-хатиблар, нуронийлар ва қўни-қўшнилар иштирок этиб, юртимизга тинчлик, оилаларга тотувлик ва дастурхонларимизга қут-барака тилаб дуо қилдилар.

Шунингдек, Қувасой шаҳри Суфон маҳалласида ташкил этилган ифторлик дастурхонида маҳалла имом-хатиби, фаоллар ва нуронийлар иштирок этдилар. Тадбир давомида Қуръони карим тиловат қилиниб, юртимиз тинчлиги ва хонадонларимизга барака тилаб дуолар қилинди.

Ифторлик дастурхонлари атрофида ҳудудлардаги имом-хатиблар, Ижтимоий ҳимоя ягона реестрида рўйхатда турган фуқаролар ҳамда жамоатчилик вакиллари иштирокида маънавий-маърифий суҳбатлар ташкил этилди. Унда меҳр-оқибат, саховат, ҳамжиҳатлик, эҳтиёжмандларга ёрдам кўрсатиш каби эзгу қадриятлар халқимизнинг асрлар давомида шаклланган олий фазилатлари экани алоҳида таъкидланди.

Дарҳақиқат, бундай хайрли амаллар халқимиз ўртасида бирдамлик ва ҳамжиҳатликни мустаҳкамлаб, муборак Рамазон ойининг баракасини ҳар бир хонадонга олиб кирмоқда. Бу эса юртимизда инсон қадри улуғланиб, меҳр-оқибат ва бағрикенглик муҳити тобора мустаҳкамланаётганининг ёрқин ифодасидир.

***

Yurtimizda o‘zining fayzli shukuhini taratayotgan muborak Ramazon oyi “Ramazon — mehr-muruvvat, ahillik va shukronalik oyi” shiori ostida yanada barakali va mazmunli o‘tmoqda. Bu muborak kunlarda keksalar, bemorlar, moddiy va ma’naviy yordamga muhtoj insonlar holidan xabar olinib, ularning ko‘ngillari ko‘tarilmoqda. Ayniqsa, ana shunday kishilar bilan birga iftorlik dasturxoni atrofida jam bo‘lish Ramazonning fayzu barakasini yanada ziyoda etmoqda.

Farg‘ona shahrida Bosh prokuratura tomonidan tashkil etilgan iftorlik dasturxoniga kam ta’minlangan, ehtiyojmand va imkoniyati cheklangan fuqarolar taklif etildi. Unda viloyat hokimi X.Bozorov, mutasaddi rahbarlar hamda viloyat bosh imom-xatibi Ubaydulloh domla Abdullayev ishtirok etdilar.

— Men ikkinchi guruh nogironiman. Turli tadbirlarga taklif qilishadi, qatnashaman. Ammo bugungi iftorlik har galgidan ham samimiy va ko‘tarinki ruhda o‘tdi. Yurtboshimizga va tashkilotchilarga rahmat, — deydi tadbir ishtirokchisi Rohila Usmonova.

Quvasoy shahrining “Huvaydo” mahalla fuqarolar yig‘inida ham samimiy iftorlik dasturxoni yozildi. Tadbir 90 yoshli nuroniy Mirzajonov To‘raxo‘ja ota xonadonida bo‘lib o‘tdi. Unda shahar hokimi Zafarjon To‘raqulov, “Nuroniy” jamg‘armasi raisi, Mahallalar uyushmasi shahar bo‘limi boshlig‘i hamda “Islom” jome masjidi imom-xatibi Alisher domla Naimov ishtirok etdilar.

— Ilgari bunday e’tiborni ko‘rmagandim. Yoshim 90 ga yetgan bo‘lsa-da, ko‘p yaxshiliklarga guvoh bo‘ldim. Ammo bugungisi boshqacha. Prezidentimiz sog‘ bo‘lsinlar, — deydi To‘raxo‘ja ota samimiy mamnuniyat bilan.

Bag‘dod tumanidagi muhtasham “Orzu” tantanalar saroyida tashkil etilgan iftorlik dasturxoniga tumandagi 56 ta mahalladan taklif etilgan aholi vakillari va nuroniylar jam bo‘lib, samimiy suhbat qurdilar. Dasturxon atrofida yurtimiz tinchligi, xalqimiz farovonligi va osoyishtaligi uchun duolar qilindi.

Quva tumani Tinchlik mahallasida yashovchi Otajonov O‘lmasjon xonadonida ham homiylar tomonidan iftorlik dasturxoni yozildi. Unda tuman hokimi Xalimjon Umarov, imom-xatiblar, nuroniylar va qo‘ni-qo‘shnilar ishtirok etib, yurtimizga tinchlik, oilalarga totuvlik va dasturxonlarimizga qut-baraka tilab duo qildilar.

Shuningdek, Quvasoy shahri Sufon mahallasida tashkil etilgan iftorlik dasturxonida mahalla imom-xatibi, faollar va nuroniylar ishtirok etdilar. Tadbir davomida Qur’oni karim tilovat qilinib, yurtimiz tinchligi va xonadonlarimizga baraka tilab duolar qilindi.

Iftorlik dasturxonlari atrofida hududlardagi imom-xatiblar, Ijtimoiy himoya yagona reyestrida ro‘yxatda turgan fuqarolar hamda jamoatchilik vakillari ishtirokida ma’naviy-ma’rifiy suhbatlar tashkil etildi. Unda mehr-oqibat, saxovat, hamjihatlik, ehtiyojmandlarga yordam ko‘rsatish kabi ezgu qadriyatlar xalqimizning asrlar davomida shakllangan oliy fazilatlari ekani alohida ta’kidlandi.

Darhaqiqat, bunday xayrli amallar xalqimiz o‘rtasida birdamlik va hamjihatlikni mustahkamlab, muborak Ramazon oyining barakasini har bir xonadonga olib kirmoqda. Bu esa yurtimizda inson qadri ulug‘lanib, mehr-oqibat va bag‘rikenglik muhiti tobora mustahkamlanayotganining yorqin ifodasidir.

Ҳудудларда масъул ташкилотлар, маҳалла фаоллари ҳамда имом-хатиблар томонидан аҳоли орасида кенг кўламли хайрли ишлар амалга оширилмоқда. Имконияти чекланган, кекса ва ёлғиз инсонлар, шунингдек ёрдамга муҳтож оилалар ҳолидан хабар олиниб, уларга Рамазон туҳфалари улашилмоқда, хонадонларда ифторлик дастурхонлари ташкил этилиб, кўнгиллар шод этилмоқда.

Қува тумани Тошкент маҳалласида истиқомат қилувчи нуроний онахон Ширмонхон ая Олтмишованинг хонадонида ташкил этилган ифторлик дастурхони ана шундай хайрли тадбирлардан биридир. Маҳалла фаоллари, қўни-қўшнилар ва нуронийлар иштирокида ўтган ушбу учрашув самимий ва кўтаринки руҳда ўтди. Дастурхон атрофида йиғилганлар юртимиз тинчлиги, осойишталиги ва халқимиз фаровонлиги учун дуо қилиб, бир-бирларига эзгу тилаклар билдирдилар.

— Тўғриси, имом домла ва маҳалла фаолларининг ўзлари ташаббус кўрсатиб, хонадонимга келиб ифтор қилишларини кутмагандим. Жуда хурсанд бўлдим. Президентимиз табрикларини етказганларида ҳаяжоним ичимга сиғмади, — дейди Ширмонхон ая самимият билан.

Шунингдек, Олтиариқ тумани Юксалиш маҳалла фуқаролар йиғинида яшовчи Икромжон ака хонадонида ҳам ифторлик дастурхони ёзилди. Ушбу тадбирда туман ҳокими Ш.Турдалиев, “Муҳаммадсобир ҳожи” масжиди имом-хатиби Д.Жабборов, маҳалла фаоллари, жамоатчилик вакиллари ҳамда нуронийлар иштирок этди.

Икромжон аканинг таъкидлашича, бундай эътибор ва ғамхўрлик инсон қалбига куч ва умид бағишлайди:
— Мен уйимга туман ҳокими, имом домлалар кириб келиб, биз билан ифтор қилишини ҳаёлимга ҳам келтирмагандим. Шу лаҳзада касаллигимни ҳам унутдим. Илгари бундай эътиборни кўрмаган эдик. Бизнинг кўнглимизни кўтарган бу хайрли ишлар учун юртбошимиздан миннатдормиз, — дейди у.

Фурқат тумани Жийдазор маҳалласида истиқомат қилувчи нуроний онахон Абдурахимова Мўминахон она хонадонида ҳам ифторлик дастурхони ташкил этилди. Меҳрибонлик ва эҳтиромдан бағри кенгайган онахон ташкилотчиларга самимий миннатдорчилик билдириб, юртимиз тинчлиги ва халқимиз фаровонлиги учун дуо қилди.

Бундай учрашувларда дастурхон атрофида нафақат ифторлик қилинди, балки бугунги тинч ва осойишта ҳаёт, юртимизда амалга оширилаётган кенг кўламли ислоҳотлар, аҳолига кўрсатилаётган ижтимоий ғамхўрликлар хусусида самимий суҳбатлар бўлиб ўтди. Бу эса халқимиз қалбида шукроналик туйғуларини янада мустаҳкамлади.

Эътиборлиси, бундай хайрли тадбирлар Данғара, Риштон, Олтиариқ, Бувайда ва бошқа туманларда ҳам изчил давом этмоқда. Ҳар бир хонадонга кириб бораётган бу меҳр ва эътибор, шубҳасиз, юртимизда аҳиллик ва ҳамжиҳатлик муҳитини янада мустаҳкамлашга хизмат қилади.

Шукроналикка тўла қалблар дуога қўл очиб, юртимизга барака, халқимизга фаровонлик, юртбошимизга куч-қувват ва собитқадамлик тиламоқдалар. Рамазоннинг ана шундай эзгу фазилатлари жамиятимизда инсонпарварлик ва бағрикенглик туйғуларини янада юксалтирмоқда.

***

Muborak Ramazon oyining fayzli kunlari yurtimizda o‘ziga xos mehr-muruvvat, ahillik va saxovat muhitini qaror toptirmoqda. Bu muborak oyning shukuhi nafaqat masjidlar, balki har bir xonadonga kirib borayotgani, ayniqsa, ehtiyojmand, keksa va yolg‘iz insonlar qalbida alohida iliqlik uyg‘otayotgani bilan ahamiyatlidir.

Hududlarda mas’ul tashkilotlar, mahalla faollari hamda imom-xatiblar tomonidan aholi orasida keng ko‘lamli xayrli ishlar amalga oshirilmoqda. Imkoniyati cheklangan, keksa va yolg‘iz insonlar, shuningdek yordamga muhtoj oilalar holidan xabar olinib, ularga Ramazon tuhfalari ulashilmoqda, xonadonlarda iftorlik dasturxonlari tashkil etilib, ko‘ngillar shod etilmoqda.

Quva tumani Toshkent mahallasida istiqomat qiluvchi nuroniy onaxon Shirmonxon aya Oltmishovaning xonadonida tashkil etilgan iftorlik dasturxoni ana shunday xayrli tadbirlardan biridir. Mahalla faollari, qo‘ni-qo‘shnilar va nuroniylar ishtirokida o‘tgan ushbu uchrashuv samimiy va ko‘tarinki ruhda o‘tdi. Dasturxon atrofida yig‘ilganlar yurtimiz tinchligi, osoyishtaligi va xalqimiz farovonligi uchun duo qilib, bir-birlariga ezgu tilaklar bildirdilar.

— To‘g‘risi, imom domla va mahalla faollarining o‘zlari tashabbus ko‘rsatib, xonadonimga kelib iftor qilishlarini kutmagandim. Juda xursand bo‘ldim. Prezidentimiz tabriklarini yetkazganlarida hayajonim ichimga sig‘madi, — deydi Shirmonxon aya samimiyat bilan.

Shuningdek, Oltiariq tumani Yuksalish mahalla fuqarolar yig‘inida yashovchi Ikromjon aka xonadonida ham iftorlik dasturxoni yozildi. Ushbu tadbirda tuman hokimi Sh.Turdaliyev, “Muhammadsobir hoji” masjidi imom-xatibi D.Jabborov, mahalla faollari, jamoatchilik vakillari hamda nuroniylar ishtirok etdi.

Ikromjon akaning ta’kidlashicha, bunday e’tibor va g‘amxo‘rlik inson qalbiga kuch va umid bag‘ishlaydi:
— Men uyimga tuman hokimi, imom domlalar kirib kelib, biz bilan iftor qilishini hayolimga ham keltirmagandim. Shu lahzada kasalligimni ham unutdim. Ilgari bunday e’tiborni ko‘rmagan edik. Bizning ko‘nglimizni ko‘targan bu xayrli ishlar uchun yurtboshimizdan minnatdormiz, — deydi u.

Furqat tumani Jiydazor mahallasida istiqomat qiluvchi nuroniy onaxon Abduraximova Mo‘minaxon ona xonadonida ham iftorlik dasturxoni tashkil etildi. Mehribonlik va ehtiromdan bag‘ri kengaygan onaxon tashkilotchilarga samimiy minnatdorchilik bildirib, yurtimiz tinchligi va xalqimiz farovonligi uchun duo qildi.

Bunday uchrashuvlarda dasturxon atrofida nafaqat iftorlik qilindi, balki bugungi tinch va osoyishta hayot, yurtimizda amalga oshirilayotgan keng ko‘lamli islohotlar, aholiga ko‘rsatilayotgan ijtimoiy g‘amxo‘rliklar xususida samimiy suhbatlar bo‘lib o‘tdi. Bu esa xalqimiz qalbida shukronalik tuyg‘ularini yanada mustahkamladi.

E’tiborlisi, bunday xayrli tadbirlar Dang‘ara, Rishton, Oltiariq, Buvayda va boshqa tumanlarda ham izchil davom etmoqda. Har bir xonadonga kirib borayotgan bu mehr va e’tibor, shubhasiz, yurtimizda ahillik va hamjihatlik muhitini yanada mustahkamlashga xizmat qiladi.

Shukronalikka to‘la qalblar duoga qo‘l ochib, yurtimizga baraka, xalqimizga farovonlik, yurtboshimizga kuch-quvvat va sobitqadamlik tilamoqdalar. Ramazonning ana shunday ezgu fazilatlari jamiyatimizda insonparvarlik va bag‘rikenglik tuyg‘ularini yanada yuksaltirmoqda.

Рамазон – Қуръон нозил қилинган, рўза фарз қилинган, савоблар бир неча баробар орттирилган ва мўминлар учун жаннат эшиклари очилган ойдир. Бу ойни ибодат, зикр, Қуръон тиловати, рўза, садақа, хайру эҳсон ва шукроналик билан ўтказиш ҳар бир мусулмон учун шараф ва улкан имкониятдир.

Аллоҳ таоло Қуръони каримда шундай марҳамат қилади: “Рамазон ойи – унда одамларга ҳидоят ҳамда ҳидояту фурқондан иборат очиқ-ойдин ҳужжатлар бўлиб, Қуръон нозил қилинган. Сизлардан ким бу ойга етса, рўза тутсин…” (Бақара сураси, 185-оят).

Бу оятда Рамазон ойининг фазилати ва унинг ила келган улкан неъмат – Қуръони карим зикр қилинган. Рамазон ойининг энг буюк аломати шуки, унда Пайғамбаримиз алайҳиссаломга ва бутун инсониятга ҳидоят манбаи бўлган Қуръони карим нозил қилинган. Пайғамбаримиз Муҳаммад соллаллоҳу алайҳи васаллам Рамазон ойининг улкан фазилатлари ҳақида шундай деганлар:

“Рамазон ойи келса, жаннат эшиклари очилади, дўзах эшиклари ёпилади ва шайтонлар кишанланади”.

Бу ҳадисда Рамазон ойида мусулмонлар учун жаннат эшиклари очилиши, гуноҳлар кечирилиши ва шайтонларнинг таъсири сусайиши зикр қилинган.

Рамазон ойининг энг улуғ ибодати – рўза. Бу ибодат Аллоҳ таолонинг буйруғи бўлиб, ҳар бир балоғатга етган, соғлом мусулмон киши учун фарз қилингандир. Аллоҳ таоло Қуръонда шундай марҳамат қилади:

“Эй иймон келтирганлар! Сизлардан олдин ўтган умматларга рўза фарз қилингани каби сизларга ҳам рўза фарз қилинди. Шоядки, тақводор бўлсангиз!” (Бақара сураси, 183-оят).

Бу оятда рўзанинг асосий мақсади тақво эканлиги таъкидланмоқда. Рўза нафақат очлик ва чанқоқликни ҳис қилиш, балки нафсни тийиш, гуноҳлардан сақланиш, қалбни поклаш ва Аллоҳга яқинлашиш учун ажойиб имкониятдир.

Пайғамбаримиз алайҳиссалом шундай деганлар: “Ким Рамазон ойида иймон ва ихлос билан рўза тутса, унинг олдинги гуноҳлари кечирилади”.

Ушбу ҳадисдан кўриниб турибдики, Рамазон ойини ибодат ва тавба билан ўтказган мусулмон гуноҳларидан покланади ва жаннатга мушарраф бўлиш имконига эга бўлади.

Рамазон ойи фақатгина рўза тутиш ойи эмас, балки инсонлар ўртасида муҳаббат, биродарлик ва хайру эҳсонни кенг ёйиш ойидир. Бу йил муборак Рамазон ойини “Рамазон — меҳр-мурувват, аҳиллик ва шукроналик ойи” шиори остида ўтказишга алоҳида эътибор қаратилмоқда. Ушбу эзгу ғоя халқимизга хос бағрикенглик, бир-бирига меҳр ва ҳамжиҳатлик фазилатларини янада мустаҳкамлашга хизмат қилади. Айниқса, Рамазон ойи инсонларни яхшилик қилишга, муҳтожларга кўмак беришга, оила ва жамиятдаги ўзаро ҳурмат ва ҳамкорликни кучайтиришга ундайдиган улуғ даврдир. Шу маънода, бу йилги шиор жамиятимизда саховат, бағрикенглик ва шукроналик муҳитини янада кенг ёйишга қаратилган муҳим ташаббус сифатида намоён бўлмоқда.

Давлатимиз раҳбари томонидан Рамазон ойида аҳолини ижтимоий қўллаб-қувватлаш мақсадида 1 триллион сўм маблағ ажратилиши юртимизда инсон қадрини юксалтиришга бўлган эътиборнинг амалий ифодасидир. Ушбу маблағлар орқали кам таъминланган оилалар, ногиронлиги бўлган шахслар, ёлғиз кексалар ва эҳтиёжманд қатлам вакилларига моддий ва маънавий кўмаклар кўрсатилади. Бу эса юртимизда ижтимоий адолат ва бирдамлик тамойиллари янада мустаҳкамланиб, ҳар бир инсон қалбида Рамазон ойининг ҳақиқий руҳи — меҳр-шафқат ва шукроналик туйғулари янада юксалишига хизмат қилади. Зеро, бу ойда қилинган ҳар бир савобли амал бир неча баробар кўпайтирилади. Пайғамбаримиз алайҳиссалом Рамазонда одамларга ниҳоятда саховатли бўлганлар. Ибн Аббос розияллоҳу анҳу шундай ривоят қилади: “Расулуллоҳ алайҳи васаллам одамларнинг энг саховатлиси эдилар. У зотнинг саховатлари энг юқори чўққига Рамазон ойида етар эди”.

Бу ҳадисдан англашиладики, мусулмон киши Рамазонда ўзининг ҳожатманд биродарларига ёрдам қўлини чўзишга интилмоғи лозим.

Бошқа бир ҳадиси шарифда Пайғамбаримиз алайҳиссалом: “Ким рўзадорга ифторлик берса, рўзадор олган савобнинг айниси унга ҳам берилади”, деганлар.

Шундан келиб чиқиб, хайру эҳсон ва ифторликларимизни ўз эгаси – муҳтожлар ва фақирлар, боқувчисини йўқотган, бир сўз билан айтганда эҳтиёжмандларга беришимиз нақадар савобли эканини унутмаслигимиз лозимдир.

Хулоса ўрнида айтадиган бўлсак, Рамазон ойи – бу маънавий юксалиш, гуноҳлардан покланиш, қалбни тозалаш ва Аллоҳнинг раҳматига эришиш имкониятидир. Бу ойда рўза тутиш, ибодат қилиш, Қуръон ўқиш, хайру эҳсон қилиш, муҳтожларга ёрдам бериш ва ҳар бир лаҳзани савобли ишларга бағишлаш лозим.

Аллоҳ таоло бизларни ушбу муборак ойнинг фазилатларидан баҳраманд қилсин, гуноҳларимизни мағфират этсин ва жаннат аҳлидан қилсин! Аллоҳ ватанимизга муборак ой сабаб Ўз раҳмати ва баракотини зиёда қилсин!

Убайдуллоҳ Абдуллаев,
Фарғона вилояти бош имом-хатиби, Уламолар кенгаши аъзоси

«Янги Фарғона» газетаси 13-сон 

***

Ramazon oyi – musulmonlar uchun eng ulug‘, fayzli va barakali oylardan biri hisoblanadi. Bu oyda Alloh taoloning rahmati keng yoyiladi, bandalarning qilgan yaxshiliklari ko‘paytiriladi, gunohlari kechiriladi va ular jannatga musharraf bo‘lish uchun ulkan imkoniyatga ega bo‘ladilar.

Ramazon – Qur’on nozil qilingan, ro‘za farz qilingan, savoblar bir necha barobar orttirilgan va mo‘minlar uchun jannat eshiklari ochilgan oydir. Bu oyni ibodat, zikr, Qur’on tilovati, ro‘za, sadaqa, xayru ehson va shukronalik bilan o‘tkazish har bir musulmon uchun sharaf va ulkan imkoniyatdir.

Alloh taolo Qur’oni karimda shunday marhamat qiladi: “Ramazon oyi – unda odamlarga hidoyat hamda hidoyatu furqondan iborat ochiq-oydin hujjatlar bo‘lib, Qur’on nozil qilingan. Sizlardan kim bu oyga yetsa, ro‘za tutsin…” (Baqara surasi, 185-oyat).

Bu oyatda Ramazon oyining fazilati va uning ila kelgan ulkan ne’mat – Qur’oni karim zikr qilingan. Ramazon oyining eng buyuk alomati shuki, unda Payg‘ambarimiz alayhissalomga va butun insoniyatga hidoyat manbai bo‘lgan Qur’oni karim nozil qilingan. Payg‘ambarimiz Muhammad sollallohu alayhi vasallam Ramazon oyining ulkan fazilatlari haqida shunday deganlar:

“Ramazon oyi kelsa, jannat eshiklari ochiladi, do‘zax eshiklari yopiladi va shaytonlar kishanlanadi”.

Bu hadisda Ramazon oyida musulmonlar uchun jannat eshiklari ochilishi, gunohlar kechirilishi va shaytonlarning ta’siri susayishi zikr qilingan.

Ramazon oyining eng ulug‘ ibodati – ro‘za. Bu ibodat Alloh taoloning buyrug‘i bo‘lib, har bir balog‘atga yetgan, sog‘lom musulmon kishi uchun farz qilingandir. Alloh taolo Qur’onda shunday marhamat qiladi:

“Ey iymon keltirganlar! Sizlardan oldin o‘tgan ummatlarga ro‘za farz qilingani kabi sizlarga ham ro‘za farz qilindi. Shoyadki, taqvodor bo‘lsangiz!” (Baqara surasi, 183-oyat).

Bu oyatda ro‘zaning asosiy maqsadi taqvo ekanligi ta’kidlanmoqda. Ro‘za nafaqat ochlik va chanqoqlikni his qilish, balki nafsni tiyish, gunohlardan saqlanish, qalbni poklash va Allohga yaqinlashish uchun ajoyib imkoniyatdir.

Payg‘ambarimiz alayhissalom shunday deganlar: “Kim Ramazon oyida iymon va ixlos bilan ro‘za tutsa, uning oldingi gunohlari kechiriladi”.

Ushbu hadisdan ko‘rinib turibdiki, Ramazon oyini ibodat va tavba bilan o‘tkazgan musulmon gunohlaridan poklanadi va jannatga musharraf bo‘lish imkoniga ega bo‘ladi.

Ramazon oyi faqatgina ro‘za tutish oyi emas, balki insonlar o‘rtasida muhabbat, birodarlik va xayru ehsonni keng yoyish oyidir. Bu yil muborak Ramazon oyini “Ramazon — mehr-muruvvat, ahillik va shukronalik oyi” shiori ostida o‘tkazishga alohida e’tibor qaratilmoqda. Ushbu ezgu g‘oya xalqimizga xos bag‘rikenglik, bir-biriga mehr va hamjihatlik fazilatlarini yanada mustahkamlashga xizmat qiladi. Ayniqsa, Ramazon oyi insonlarni yaxshilik qilishga, muhtojlarga ko‘mak berishga, oila va jamiyatdagi o‘zaro hurmat va hamkorlikni kuchaytirishga undaydigan ulug‘ davrdir. Shu ma’noda, bu yilgi shior jamiyatimizda saxovat, bag‘rikenglik va shukronalik muhitini yanada keng yoyishga qaratilgan muhim tashabbus sifatida namoyon bo‘lmoqda.

Davlatimiz rahbari tomonidan Ramazon oyida aholini ijtimoiy qo‘llab-quvvatlash maqsadida 1 trillion so‘m mablag‘ ajratilishi yurtimizda inson qadrini yuksaltirishga bo‘lgan e’tiborning amaliy ifodasidir. Ushbu mablag‘lar orqali kam ta’minlangan oilalar, nogironligi bo‘lgan shaxslar, yolg‘iz keksalar va ehtiyojmand qatlam vakillariga moddiy va ma’naviy ko‘maklar ko‘rsatiladi. Bu esa yurtimizda ijtimoiy adolat va birdamlik tamoyillari yanada mustahkamlanib, har bir inson qalbida Ramazon oyining haqiqiy ruhi — mehr-shafqat va shukronalik tuyg‘ulari yanada yuksalishiga xizmat qiladi. Zero, bu oyda qilingan har bir savobli amal bir necha barobar ko‘paytiriladi. Payg‘ambarimiz alayhissalom Ramazonda odamlarga nihoyatda saxovatli bo‘lganlar. Ibn Abbos roziyallohu anhu shunday rivoyat qiladi: “Rasululloh alayhi vasallam odamlarning eng saxovatlisi edilar. U zotning saxovatlari eng yuqori cho‘qqiga Ramazon oyida yetar edi”.

Bu hadisdan anglashiladiki, musulmon kishi Ramazonda o‘zining hojatmand birodarlariga yordam qo‘lini cho‘zishga intilmog‘i lozim.

Boshqa bir hadisi sharifda Payg‘ambarimiz alayhissalom: “Kim ro‘zadorga iftorlik bersa, ro‘zador olgan savobning aynisi unga ham beriladi”, deganlar.

Shundan kelib chiqib, xayru ehson va iftorliklarimizni o‘z egasi – muhtojlar va faqirlar, boquvchisini yo‘qotgan, bir so‘z bilan aytganda ehtiyojmandlarga berishimiz naqadar savobli ekanini unutmasligimiz lozimdir.

Xulosa o‘rnida aytadigan bo‘lsak, Ramazon oyi – bu ma’naviy yuksalish, gunohlardan poklanish, qalbni tozalash va Allohning rahmatiga erishish imkoniyatidir. Bu oyda ro‘za tutish, ibodat qilish, Qur’on o‘qish, xayru ehson qilish, muhtojlarga yordam berish va har bir lahzani savobli ishlarga bag‘ishlash lozim.

Alloh taolo bizlarni ushbu muborak oyning fazilatlaridan bahramand qilsin, gunohlarimizni mag‘firat etsin va jannat ahlidan qilsin! Alloh vatanimizga muborak oy sabab O‘z rahmati va barakotini ziyoda qilsin!

Ubaydulloh Abdullayev,
Farg‘ona viloyati bosh imom-xatibi, Ulamolar kengashi a’zosi

«Yangi Farg‘ona» gazetasi 13-son

يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ

«Эй иймон келтирганлар! Сизлардан аввалгиларга фарз қилинганидек, сизларга ҳам рўза фарз қилинди. Шоядки, тақво қилсангиз» (Бақара сураси, 183-оят).

«Шоядки, тақво қилсангиз» ишорасини Аллоҳ бу ой ила инсонни қалбини ислоҳ қилишликни ирода қилган бўлса не ажаб . Бу раҳмат ойига истиғфор билан кириб, тасбеҳ ва ҳамдлар билан Аллоҳни зикр қилиш лозим. Инсонни қанча ибодат қилмасин унинг амаллари эмас, балки Аллоҳнинг раҳмати уни жаннатга олиб киради. Рамазон шундай ойки, унда Қуръони карим нозил бўлган. Бу ойда ўқилган фурқон соҳибини шафоат қилади. Муборак ойда шаҳватдан тийилиш бор, Аллоҳни рўзадор учун ваъдалари бор, унда саҳарлик бор, пайғамбаримиз алайҳиссалом айтган барака бор. Бу ойда ифторлик бор, Роббисини ҳузурида хурсанд бўлишлик бор. Унда рўзадорга ифторлик қилиб савобда ўзиб кетиш бор. Холис ният ва солиҳ амаллар ила муқаддам ўтган гуноҳларини кечиришлик бор. Чунки бу ой тамомий Аллоҳни раҳмат ойидир. Ким бу ойни ғанимат билиб эъзозласа, дархақиқат Аллоҳ ҳам у кишини эзозлайди.

Расулуллоҳ ﷺ дедилар:
لِلصَّائِمِ فَرْحَتَانِ: فَرْحَةٌ عِنْدَ فِطْرِهِ، وَفَرْحَةٌ عِنْدَ لِقَاءِ رَبِّهِ

«Рўзадор учун икки хурсандчилик бор: ифтор қилган пайтидаги хурсандчилиги ва Парвардигорига йўлиқган пайтидаги хурсандчилиги» (Саҳиҳи Бухорий). Бу хурсандчиликка Аллоҳ хар бандасини етказсин.

Агар бу раҳматни тушуниб етсак, ибодатлардан лаззат оламиз, бир йилга етгулик иймон деб номланмиш озуқага эга бўламиз. Вақт бизни аямайди, умр эса ўткинчи, Ўзимиз билан фақат солиҳ амалларимизгина қолади. Рамазон эса ғанимат биродар…

Хожимурод Мамадалиев,
Қўштепа тумани «Салмони Форсий» масжиди имом-ноиби

***

Alloh taolo muborak kalomi sharifida bunday marhamat qiladi:

يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ

«Ey iymon keltirganlar! Sizlardan avvalgilarga farz qilinganidek, sizlarga ham ro‘za farz qilindi. Shoyadki, taqvo qilsangiz» (Baqara surasi, 183-oyat).

«Shoyadki, taqvo qilsangiz» ishorasini Alloh bu oy ila insonni qalbini isloh qilishlikni iroda qilgan bo‘lsa ne ajab . Bu rahmat oyiga istig‘for bilan kirib, tasbeh va hamdlar bilan Allohni zikr qilish lozim. Insonni qancha ibodat qilmasin uning amallari emas, balki Allohning rahmati uni jannatga olib kiradi. Ramazon shunday oyki, unda Qur’oni karim nozil bo‘lgan. Bu oyda o‘qilgan furqon sohibini shafoat qiladi. Muborak oyda shahvatdan tiyilish bor, Allohni ro‘zador uchun va’dalari bor, unda saharlik bor, payg‘ambarimiz alayhissalom aytgan baraka bor. Bu oyda iftorlik bor, Robbisini huzurida xursand bo‘lishlik bor. Unda ro‘zadorga iftorlik qilib savobda o‘zib ketish bor. Xolis niyat va solih amallar ila muqaddam o‘tgan gunohlarini kechirishlik bor. Chunki bu oy tamomiy Allohni rahmat oyidir. Kim bu oyni g‘animat bilib e’zozlasa, darxaqiqat Alloh ham u kishini ezozlaydi.

Rasululloh ﷺ dedilar:
لِلصَّائِمِ فَرْحَتَانِ: فَرْحَةٌ عِنْدَ فِطْرِهِ، وَفَرْحَةٌ عِنْدَ لِقَاءِ رَبِّهِ

«Ro‘zador uchun ikki xursandchilik bor: iftor qilgan paytidagi xursandchiligi va Parvardigoriga yo‘liqgan paytidagi xursandchiligi» (Sahihi Buxoriy). Bu xursandchilikka Alloh xar bandasini yetkazsin.

Agar bu rahmatni tushunib yetsak, ibodatlardan lazzat olamiz, bir yilga yetgulik iymon deb nomlanmish ozuqaga ega bo‘lamiz. Vaqt bizni ayamaydi, umr esa o‘tkinchi, O‘zimiz bilan faqat solih amallarimizgina qoladi. Ramazon esa g‘animat birodar…

Xojimurod Mamadaliyev,
Qo’shtepa tumani «Salmoni Forsiy» masjidi imom-noibi